بنغازي
كتبهارزان نعيم المغربي ، في 6 مايو 2008 الساعة: 14:48 م
الشاعر هليل البيجو باستضافة برج الحمل
بنغازي
تغربت وشفت بلادات الاهيهات البنغازي ما ألقيت خوات
ماالقيت رفيق
البنغازى في العين يليق
اللي ايجيها والحال رقيق
وفى شدات
ايروق وما يلحظ عازات
مالقيت شبيه
ايروق لعيني وين اتجيه
الكون بجملة ها اللي فيه
غير خيالات
امعا بنغازى مزهودات
مالقيت مثيل
البنغازى في العين يخيل
غلاها فى المكنون نزيل
ومرفوعات
اقداراه ديمه ع السّيات
تغربت اسنين
وهضبت أيسارا ويمين
ولكن خوذ علي أيمين
بلا رجعات
علت بنغازى ع الزينات
تغربت أشهور
وقصّيت فيافي وبرور
عدا بنغازي كله زور
ومغشوشات
ابلادات العالم شينات
عديت بعيد
البنغازى ما لقيت نديد
اتربي وتكبر وتزيد
ومفتوحات
أيديها من غير أحسابات
بلا تفكير
البنغازي ما هناك نظير
زكت ما فيها قولة غير
ولا لولات
تبارك رب المخلوقات
يا طيب نباها
بنغازي رتبه ووجاها
هلها للضيف اللي جاها
والجارات
أصحاب عوائد معروفات
يا طيب عربها
علوا فى الحين نسبها
أشهاده والتاريخ كتبها
الهم فزعات
عرب بنغازى فى الزرات
بنغازى ود
اللي ايجيها ما يخاف نكد
اتربّي وتلم الشـــــــــــارد
بلا منات
طبايع فيها مغروسات
بنغازى بسمه
فى خد الدنيا مرتسمه
كلمتها ما هى منقسمه
فى اللمات
أرياها ديمه متفقات
بنغازى كيف
وراحة بال بلا تخويف
حنونه ع اللاّفى والضيف
وبالبسمات
اتقابل فى عز الويلات
بنغازى ديمه
حره ما ترضى بالضيمه
صيت عربها فوق القيمة
والصيفات
كريمه واقلوب سليمات
هليل البيجو
البريد الألكتروني للشاعر هليل البيجو :hbhb1961@yahoo.com
ـــــــــــــــــــــــــــــــــــــــــــــــــــــــــ
التصنيفات : قصائد الاصدقاء | السمات:قصائد الاصدقاء
أرسل الإدراج | دوّن الإدراج
